Rwabugiri Yiganye Ruganzu Ntibyamuhira

Hari mu gitaramo, havamo bamwe batekereza uko Ruganzu yitatiraga igihugu akabona kugiteza. Rwabugili yishyiramo ko akwiye kubigenza nka Ruganzu akajya kwitatira u Bunyabungo. Ahamagara Kabare na Ruhararamanzi na Rutishereka na Bisangwa abajyana ukwabo arababwira ati "nimuze tujyane i Bunyabungo ubu uko turi aha". Babyumvise barumirwa. aho niho rya zina ry'abanyarwanda bita"nyamugirubutangwa" rifashe. abo abwiye baremera ariko ari ukubura uko bagira. Bisangwa ahabwa ingoma, Ruhararamanzi ajya ku ruhago, Kabare atwara amacumu ya Rwabugili. Baragenda bageze ku kivu bahamagara abasare barabaturira. Baturira mu museke. Agasusuruko ngo kamare gukwira batunguka ku ka rubanda kwa Mpfizi. Bahasanga abanyabungo benshi. Bakubise Rwabigili amaso bamwe baramumenya bati "uriya ni Rwabugili" abatamuzi barabihakana bati"ntabwo ariwe kuko atatinyuka kuza ino kandi amaze kwica Rutubuka". Havamo umunyabungo umwe yegera Rwabugili aramubaza ati wa mugabo we witwa nde? undi aramusubiza ati"ndi kigeli" aho abanyabungo bateraniye baramuseka bati"ubanza utagira ubwenge, wabaye we watinyuka kugera ino warishe Rutubuka" Rwabugili akaba yanywaga itabi haza umunyabungo ufite umuhoro awufasha mu nkono y'itabi ya Rwabugili ayimuvana mu kanwa arayita. Rwabugili ahaguruka arakaye abwira uwo mugabo ati" kuba umunyamahanga ninko kurwara igisebe cy'umufunzo, iyo aba ari njye ufite uwo muhoro mba nywugukubise". Rwabugili arongera aramubwira ati "icyakora bika uwo muhoro kuko ni bujya kugera mu makuka y'inka ndawugukubita", abanyabungo baraho babyumvise bariyamira bati"uraba utibara ukavuga kwica?" Ruhararamanzi yongorera Kabare ati "turashize" noneho bajya inama yuko babigenza. Bisangwa ati mureke nsabe abanyabungo njye kubonana na Mpfizi. asanga abanyabungo arababwira ati"ndasaba kujya kubonana na mpfizi". ubwo abanyabungo batangira kugira ubwoba bakekako Rwabugili ari umutabazi wa bucengeri. bituma bemerera Bisangwa ko abonana na mpfizi. ageze aho ari aramubwira ati"nduzi mwarakaye mushaka kutwica ngo murahorera Rutubuka ariko mwatwica mwagira mureke dukore umugenzo wacu nituwurangiza mutwice" mpfizi ati" ni mugenzo ki" undi ati" ni ugukubita ingoma yacu imirishyo icumi". ubwo kwari ugushaka guhuruza kuko mu Rwanda batari bazi aho Rwabugili yagiye. mpfizi arabyemera abwira Bisangwa ati " wenda ukubite imirishyo ijana ni hahandi turabica" ubwo Bisangwa ajya ahirengeye abanyabungo baramuhagarikira. akubita imirishyo igihe kirekire ati " uwo numwe" akomeza atyo ageze kuwa gatatu ingarurarugo zumva ingoma y'impuruza ziherako zambuka i kivu zitera kwa mpfizi. igihe abanyabungo bagihagarikiye Bisangwa babona urugo rwa mpfizi rurashya. bahera ubwo barwana mpfizi arapfa. wa mugabo watesheje Rwabugili inkono arafatwa hamwe na wa muhoro we Rwabugili arawumukubita.