Bang Media

Inama 6 Zo Guhitamo Impano Izashimisha Umuhungu'Umugabo Ukunda

Niba wifuza guha impano umugabo wawe cyangwa umuhungu w’inshuti yawe hari ibitekerezo by’ibyo wamugenera kandi bikamushimisha.

Ubushakashatsi bwakozwe bwagaragaje ko kugurira umwana impano cyangwa se umukobwa ngo byoroha ugereranyije no kugurira umugabo cyangwa se umuhungu mukundana.

Abagabo benshi batekereza ibintu bimwe; baba bumva akenshi impano zabo ari iz’amasogisi, utwambaro tw’imbere cyangwa karavate.

1. Niba hari imikino cyangwa igitaramo rimwe na rimwe ujye umugurira itike yo kwinjira

Iyi ni imwe mu mpano ishobora gushimisha abagabo, yaba abubatse, abatandukanye n’abagore babo, abakiri gutereta n’abatarushinga. Niba rero wasohokanye n’umukunzi wawe agiye kureba umukino w’ikipe akunda cyangwa se agiye mu gitaramo cy’ itsinda ry’abaririmbyi akunda cyangwa umuhanzi akunda kugira ngo umushimishe kurushaho ujye umugurira itike yo kwinjira atabizi maze nimugera aho mwinjirira uyimutunguze, azahita abona ko umwitaho, ko ibyo aha agaciro n’ibimushimisha ubibona.

2. Mukorere urutonde rw’amafilime cyangwa amakinamico akunda uyamushyirire kuri DVD player

Niba umugabo/umukunzi wawe akoresha amafaranga menshi akugurira indabo, imyambaro n’amaherena kubera iki wowe utareba akantu umuha koroheje nko kumukorera urutonde rwa filime cyangwa amakinamico akunda ukayamushyirira kuri DVD cyangwa CD hanyuma ukazayimuha igihe muri kumwe cyangwa se wamusuye.

3. Cagura indirimbo uzi akunda uzimushyirire kuri CD player

Nta mpamvu yo guhora uha umugabo wawe cyangwa se umusore mukundana impano zihenze, rimwe na rimwe ujye unyuzamo umucagurire uturirimbo uzi ko akunda nurangiza utumushyiririre kuri CD bizajya bituma igihe yicaye arimo kuzumva agutekerezaho. Niba rero harimo izo mwumva muri kumwe zijya zimwibitsa ibihe byiza mwagiranye bituma abona ko umuzirikana buri gihe kandi umuhoza ku mutima.

4. Muhe impano y’imyenda mu gihe ubona ayikeneye

Nubona umugabo wawe arimo ashaka kugura imyambaro mishya cyangwa se arimo guhamagara mu maduka bacuruza imyenda ababwira ko ayikeneye, kubera iki wowe utahera kuri icyo ngo noneho uzamuhe impano y’uwo mwenda yifuza? Ugomba ariko kwitwararika ukamenya imyenda ibera umukunzi wawe, atari ukugenda ngo ugure ibyo ubonye byose.

5. Mugurire akuma gateka cyangwa se agashyushya icyayi

Nugurira umukunzi wawe aka kuma gashyushya icyayi bizatuma adatakaza imbaraga nyinshi kugirango akore icyayi, niba kandi atanagikunda bizatuma azajya agira imbaraga zo kukinywa kubera impano wamuhaye. Ikindi kandi, bizatuma umugabo wawe yishimira kugukorera icyayi igihe icyo ari cyo cyose .

6. Mugurire ikofi cyangwa se isaha

Impano nk’izi ni impano abantu batangiye gukundana cyangwa se guteretana bakoresha. Ibi byereka umuhungu/umukunzi wawe ko umwitayeho. Guha rero umusore mukundana cyangwa umugabo wawe ikofi bizatuma agira isuku mu mifuka ye kandi uko azajya ayikura mu mufuka agiye kuremo cyangwa kwishyura azajya ahora akwibuka.

No comments: